肉酸野

粵語有一個詞「肉酸」，好鬼傳神，佢比「核突」程度輕d曖昧d，又比「礙眼」溫柔，再重d就「起雞皮」了——而且見到肉酸野，真的好像有酸酸的感覺……

江記的「飯氣劇場」係逐個人物出書的，最近出到真多MAN了，就是紅黃綠三子，極簡主義式取名，就叫黃色、紅色、綠色。飯氣係四格漫畫，每個角色都有設定，例如黃色係大佬、主角，一般對白都由佢講；紅色係「下把」，往往是襯托黃色或被打；綠色是「花瓶」，無對白，只在一邊面紅、飾演靚仔。早期真多MAN因為行簡約路線而玩concept，被讀者稱為「最有禪味」，一句對白都無的冷幽默。

但正所謂人在江湖（漿糊）身不由己，真多man後走向性別色彩突出的路線：一係就好麻甩到玩腹肌（黃色唔見左「六舊腹肌」，想盡辦法要尋回），一係就去到盡扮女人（全部維持有鬚根）。真多man用來寄託毒男夢想（包括chok下樣就可以呃到女仔），有時當然亦有鹹濕野啦（書中有一則「門」，係要用腦先識笑的）。就好似無線福祿壽玩扮野，其實寄託了一種基層的queer（酷兒，又譯酷異）。所以小小的四格漫畫其實承載性別倒錯，讓我們在衝擊審美標準與性別常識的千奇百怪匯演中，有釋放的快感。

作者江記個腦究竟裝乜，我一直都好好奇。佢設計左咁多咁有concept的人物和情節，卻只想裝入四格漫畫裡面，淨係俾我地笑下？會不會有點覺得龍游淺水呢？哦，所以書中都有中篇〈我老闆係外星人〉。

男性係權威，權威就由制服代表，所以真多man仲會玩埋制服，呢本漫畫《真多man人在漿糊身不由己！》中亦有諷刺香港如今警權過大、警察執法不公的現象，雖然手法實在好幽默溫柔，但由紅黃綠三隻出演，就上左一層「肉酸lens」。個封面用的手法係今日手機apps常見的少女漫畫玫瑰星星（低解像），非常over，所以其實都幾camp。又好似粵語講，「我鍾意食鹹濕野」，亦有人如我，鍾意睇真多man呢尐肉酸野。如果唔係好明我講乜，即管去書店翻一翻啦。

（刪節版刊AM730）