五個怪癖

（實在太多人寫了，愈來愈難寫。）

1.曲膝坐法。

（前提：有地就坐，無端端做乜要企？）

一般來說，一坐上凳就會有曲起一條腿壓在屁股下面。如果打算坐上久一點，二話不說就脫鞋盤膝。遲些就會靜脈曲張，現在籮柚已經夠大。

2.不夠高貴的無意識

我有一部分的衣服格調相當高貴，但穿上它們之後我總是無意識地做些不相稱的行為。有時穿著雪白行政長袍（造型參見《妙手仁心3》），突然會發現自己站在街邊篤咖喱魚蛋，咖喱汁滴到飛起。而我平時係唔食咖喱魚蛋的。穿著全黑長裙配銀長鍊，個煎釀三寶袋突然會穿左！咁就成身成手都係豉油勒。

又試過身穿淺藍繡花小鳳仙裝上衣、藍紫絲裙，上班時間在黃大仙區暴走搶的士，尖呼「車呀仆街！」

至於穿窄身長裙打羽毛球和穿唐裝打排球，呢d係自由意志的選擇，不屬於無意識範疇。

3.突然會興起吃掉別人吃剩的殘羹。

有一晚在學生報，有個朋友七點吃剩了半碟餐肉蛋飯，還有一條青菜。然後到十一點，我突然心血來潮，吃掉了那隻蛋。再過半個鐘，又心血來潮吃掉了那半片餐肉。到三點鐘，把剩下的有淋豉油的飯都吃掉了，只剩白飯和青菜。當時我一點都不餓。這個怪癖近來又發作過一次，但過程已經不記得了。

其實我也會隨時隨地進攻他人盤子裡的食物，即張大春所謂的「飯匙欠」。不過這個不算怪癖吧。


4.間隔暴走症

20歲後開始會被間隔引發高亢情緒，舉例而言如在台下聽演講、聽課時，會高聲笑出來、喊話上去，到後來自己上台演講時，就會產生想衝下台和觀眾玩的慾望，於是演講突然會變成（用咪）與台下某個人（不相識的）鬥嘴，人皆以為鄙人失控。但這是……為了世界的平衡……很偉大的。

5.亂間書。

間書對我而言沒有「提示重點」的作用，只是「幫助運作」。艱深的書一定要間才能看入腦，間書一定要用optex的淺藍色螢光筆，齋間關鍵詞唔夠，精警句子又間，重要轉折又間，例子又間，結果全本書係唔係都間晒。如果精神唔夠，會無端端間埋「what」、「because」、「too much」呢d唔拉更字詞；有一次太眼訓，乾脆全段間晒，第朝再睇。


指定接棒：

李潔茵
浩二
小低
孤草
matthew

想指定佢地但佢地未必會接棒：

李智良
譚棨禧
american boy
葉輝